Luk 18 | ZomZIV | STEP | Tua ciangin Jesu in a nungzuite, lungkia lo-a thu a nget tawntung nadingun gentehna khat a gen hi.

Luke 18

A Kuhkal Meigongnu tawh Gentehna

1 Tua ciangin Jesu in a nungzuite, lungkia lo-a thu a nget tawntung nadingun gentehna khat a gen hi. 2 Amah in, “Khuapi khatah Pasian kihta lo, mite a awlmawh lo thukhenpa khat om hi. 3 Tua khuapi sunga meigongnu khat ama kiangah pai ngitnget a, ‘Ka langpa tungah mantakin thu hong khensak in,’ ci-in ngen hi. ^a

4 “Amah in tawlkhat sung a nial hi. Ahi hangin a tawpkhakna ah, ‘Pasian nangawn kihta loin mite ka awlmawh loh hangin, 5 hih meigongnu in hong buaisak den ahi manin, amah hong paipai-a kei hong gimsak ngi-ingei nawn loh nadingin a thu tangtakin khensak ning!’ ci-in ngaihsun hi,” a ci hi.

6 Tua ciangin Topa in, “A thutang lo tua thukhenpa gente ngaihsun dih un. 7 Pasian in, sun le zana ama kianga kiko, a teelsate adingin thu khensak lo ding ahi hiam? Amaute ngaksaksak ding ahi hiam? 8 Ken kong geninah amaute thu manlangtakin a khensak ding hi. Ahi zongin Mihing Tapa hong pai ciangin leitungah upna a mu ding hiam?” a ci hi.

Pharisee-pa leh Siah-dongpa tawh Gentehna

9 Amaute thumaanna kimuanga midangte khempeuh a neumuh pawlkhatte tungah Jesu in gentehna gen a, 10 “Pharisee khat le siahdong khat mi nih thungen dingin biakinnpi ah a pai uh hi. 11 Pharisee-pa dingto a, ama thu ^{▼▼18.11 Ahikeh tungah} amahmah in ngena, ‘Pasian aw, keimah midangte khempeuh - misuamte, a kheltatte, angkawmte tham lo hih siahdongpa bang hi lo ka hi manin na tungah ka lungdam hi. 12 Nipikal khatin nih vei an tangin ka ngah khempeuh sawm ah khat ka pia hi,’ ci hi. ^c

13 “Siahdongpa ahileh a gamlapi-ah a ding hi. Amah in vantung lam nangawn ento loin a awm tum-a, ‘Pasian aw, mawhneipa keimah hong lainat in,’ ci hi.

14 “A khat pa sangin hih pa, Pasian mai-ah diktangsa in innah a ciah hi, cih kong gen hi. Ahang in, amah le amah a kitawisangte kiniamsak dinga amah le amah a kiniamsakte a kitawisang ding hi,” a ci hi. ^d

Naupangnote le Jesu

15 “Naungekte, Jesu a lawngsak dingin mipite in ama kiangah a paipih uh hi. Nungzuite in a muh uh ciangin amaute a tai uh hi. 16 Ahi hangin Jesu in naupangnote ama kiangah sama, “Naupangnote ka kiangah hong paisak un. Amaute na dal kei un, Pasian gam in hih bangte aa ahi hi. 17 Thutak kong geninah, naupangno banga Pasian gam a sang lo peuhmah tua gam sungah a lut ngei kei ding hi,” a ci hi. ^e

Ahau Ukpa

18 Ukpa khat in ama kiangah, “A hoih siapa aw, nuntak tawntungna ka luah theih nadingin ka hih pelmawh ding bang ahi hiam?” ci-in a dong hi. ^f

19 Jesu in, “Bang hangin kei hoih hong ci na hi hiam? Pasian bek longal kuamah a hoih a om kei hi. 20 Angkawm kei in, tual that kei in, gu kei in, zuau teci pang kei in, na nu na pa pahtawi in, ^{▼▼18.20 Pk. 20:12-16; Tp. 5:16-20} cih thupiakte na theihsa ahi hi,” ci-in a dawng hi. ^h

21 Tuapa in, “Tuate khempeuh ka neu-a kipan ka zuihsa ahi hi,” a ci hi.

22 Jesu in hih thu a zak ciangin ama kiangah, “Na khat na samlai hi. Na neihsa khempeuh zuak inla, mizawngte pia in. Tua hileh vantungah gou na nei ding hi. Tua khit ciangin hong pai-in kei hong zui in,” a ci hi. ⁱ

23 Tuapa in hih thu a zak ciangin hau mahmah ahi manin a lungsi dedu hi. 24 Jesu in amah en a, “A haute Pasian gam a lut nading haksa mahmah hi! 25 Mihau khat Pasian-gam sungah a lut ding sangin kala-oh khat phimbil vangah a thawl ding a baihzaw takpi ding hi,” a ci hi. ^j

26 Hih thu a zate in, “Tua hileh hotkhiatna kua in ngah zo peuhmah ding hiam?” a ci uh hi.

27 Jesu in “Mihing hih theih lohte Pasian in hih thei hi,” ci-in a dawng hi. ^k

28 Peter in ama kiangah, “Kote in ka neih khempeuh uh nusia in nang kong zui uh hi!” a ci hi.

29 Jesu in amaute kiangah, “Thutak kong geninah, Pasian gam hangin a inn, a zi, a sanggampate, a nu-le-pa le a tate a nusia peuhmah in, 30 hih khanghunah a zah tampi ngah in, hong tung ding khanghunah nuntak tawntungna a ngah ding hi,” a ci hi. ^l

Jesu in A Sih ding Genkhol Leuleu

31 Jesu in Sawm le nihte paipih tuamin amaute kiangah, “Eite Jerusalem ah i paito dinga, Mihing Tapa thu kamsangte gelhsa khempeuh a tangtung ding hi. 32 Gentile-te khutah amah a piakhia ding uh hi. Tuate in amah zahko-in, engbawlin, cilphih-in, satin that ding uh hi. 33 A ni thumna ni-in a tho kik ding hi,” a ci hi.

34 Nungzuite in hih thute khat beek a theitel kei uh hi. Amaute tungah a khiatna ki-im lai-a, amah in bang thu gen hiam, cih a thei kei uh hi. ^m

Khutdawh-a Ngen Mittawpa in Khua Mu

35 Jericho ah Jesu a tun kuan ciangin mittaw khat lamgei-ah tu-in khutdawhin a ngen hi. 36 Tuapa in mihonpi lam pai a zak ciangin, bang thu piang hiam, cih a dong hi. 37 Amaute in ama kiangah, “Nazareth mi Jesu in hong nawk laitak hi,” ci-in a gen uh hi. ⁿ

38 Amah in, “David Tapa Jesu aw, kei hong lainat in!” ci-in a galsap hi.

39 A madawk mipite in amah tai uh a, daitaka a om nadingin a gen uh hi. Ahi hangin tuapa in, “David Tapa aw, kei hong lainat in,” ci-in a kinak ko semsem hi.

40 Jesu khawl-a ama kiangah tuapa a paipih nadingun thu a pia hi. Tuapa ama kiangah a tun ciangin Jesu in, 41 “Bang kong hihsak ding deih na hi hiam?” ci-in a dong hi.

Amah in, “Topa aw, khua ka mu nuam hi,” ci-in a dawng hi.

42 Jesu in, “Khua mu ta in; na upna in nang hong damsak zo hi,” a ci hi. 43 Tua khit phetin khua mu pah lian a, Jesu nungzui-in Pasian a phat hi. Mi khempeuh in zong tua thu a muh uh ciangin Pasian a phat uh hi. ^o